Laugardagsfundur HEILAHEILLA var haldinn í aðstöðu félagsins að Sigtúni 42, Reykjavík, 4. maí 2024. Sérstakur gestur fundarins var Jón Hjartarson, leikari, rithöfundur og skáld. Að lokinni innsetningu flutti Þórir Steingrímsson, formaður, stutt erindi um stöðu félagsins hér á landi og í Evrópu. Tók Jón við og las nokkur ljóð úr nýútkominni ljóðabók sinni “TÆPASTA VAД. Flutti hann formála um hvert kvæði með vísan í náttúruvernd og mátti skilja, að maðurinn gæti gert betur en hann gerir. Að loknum umræðum var Jóni þökkuð heimsóknin og fundarmenn tóku hvern annan tali, nokkrir nýkomnir, og spunnust frjóar umræður um gildi félagsins fyrir félagsmenn hér á landi. Meðal annars um gaumstol, en gaumstol er skynröskun í kjölfar heilaskemmda, oftast vegna heilablóðfalls og lýsir sér að jafnaði þannig að sjúklingur tekur ekki eftir eða bregst ekki við því sem á sér stað til vinstri. Þetta getur komið fram í því að sjúklingur les aðeins hægri helming orðs eða setninga, lítur til hægri þegar einhver gengur framhjá vinstra megin við hann, eða borðar einungis af hægri helmingi disks síns o.s.frv.. Að lokum boðaði formaðurinn fund að sumri loknu, laugardaginn 7. september 2024 og hvatti alla að taka þátt.
