Miðvikudaginn 7.júní 2006 hófst formlegt söfnunarátak fyrir sjóðinn Faðm, sem er stuðningssjóður fyrir unga foreldra sem hafa fengið heilablóðfall. Fundurinn var haldinn í Iðuhúsinu við Lækjargötu við fjölmenni.
Fundarstjóri var Rósa Björk Brynjólfsdóttir og lýsti Heilaheill sem félagi fólks, sem fengið hefur heilablóðfall, aðstandenda þeirra og fagfólks. Meðal fundarmanna sáust Karl Sigurbjörnsson, biskup, alþingismennirnir Össur Skarphéðinsson, Ásta R. Jóhannesdóttir, Helgi Hjörvar og Helgi Seljan fyrrverandi alþingismaður o.fl.. Katrín Júlíusdóttir, alþingismaður, sem var í undirbúningshópnum ásamt þeim Kristínu Stefánsdóttur og Birgi Henningssyni, kynnti söfnunina og sjóðinn.
Reikningsnúmer söfnunar er : 0101-05-290900 – kennitala: 611294-2209. Þá kynnti hún Þórunni Lárusdóttur, leik og söngkonu, sem verndara Faðms. Ávarpaði Þórunn fundinn og greindi frá sinni reynslu sem aðstandandi.
Eftir það söng hún nokkur lög við undirleik Snorra Petersen. Jón Ólafsson, tónlistarmaður, söng nokkur lög og síðan flutti Jón Hersir Elíasson, taugasérfræðingur á LSH, fróðlegt erindi um ungt fólk og heilablóðfall.
Eftir það hófust umræður, undir stjórn Rósu, og bárust margar fyrirspurnir úr sal. Heiðar Örn úr Botnleðju söng nokkur lög og að lokum ávarpaði Þórir Steingrímsson, formaður Heilaheilla, fundinn og þakkaði fundarmönnum fyrir góða þátttöku og stuðning.
