Heimasíða HEILAHEILLA hafði tal af þeim Mary Björku Sigurðardóttur og Þórarni Björnssyni, nema við Háskóla Íslands. Hann fékk slag fyrir nokkrum árum og í kjölfarið helftarlömun og málstol. Hann er einn af mörgum félögum HEILAHEILLA og gott dæmi þess, að þó að fólk verði fyrir slagi, þá er áfall ekki endirinn! Síður en svo, þau eru að ljúka námi við Háskóla Íslands og verkefni þeirra er m.a. að fjalla um málstol. “Við gerðum lokaverkefni okkar til B.A. gráðu í þroskaþjálfafræði um málstol“ sagði Þórarinn. „Verkefni okkar er þrískipt. Í fyrsta lagi gerðum við fræðslubækling sem ætlaður er að mestu leiti aðstandendum til að auðvelda þeim samskiptin og skilning á málstoli. Í öðru lagi gerðum við þolinmæðiskort eins og við kjósum að kalla þau en þau eru ætluð þeim sem eru með málstol til þess að fá meiri þolinmæði frá samfélaginu og í þriðja lagi gerðum við fræðilegri skýrslu um málefnið sem ber heitið Maður fyrir borð. Þetta er 10 eininga lokaverkefni til B.A. gráðu í Þroskaþjálfafræðum á Menntavísindasviði við Háskóla Íslands. Leiðsögukennarar okkar voru þær Guðrún V. Stefánsdóttir dósent við Háskóla Íslands og Kristín Björnsdóttir lektor við Háskóla Íslands“ sagði Þórarinn. Mary bætti við “að ástæðan fyrir því að þetta málefni vakti athygli okkar er sú að við lentum sjálf í þessari lífsreynslu, annars vegar sem sá aðili að hafa glímt við málstol af eigin raun og hins vegar að vera maki þess sem fékk málstol“ sagði hún og brosti. Svo hélt hún áfram. „Við fórum út í gerð bæklingsins vegna þess að um 150 manns fá málstol á ári hverju á Íslandi ef við miðum við tíðni málstols í Danmörku en þar fá 2.500–3.000 manns málstol á ári“ sagði hún „og ekki er til neinn bæklingur um málefnið á íslensku. Við teljum að fyrir hvern þann sem fær málstol þá þurfi að lágmarki tvö eintök af bæklingnum til fjölskyldumeðlima til þess að fræða þá um málstol og hvernig þeir geti stigið fyrstu skrefin í áttina að samskiptum við einstaklinginn með skilning og virðingu. Því eins og stendur í bæklingnum: „Að eiga erfitt með mál þýðir ekki að þörfin fyrir tjáningu sé farin“. Þessi hópur á í verulegri hættu að einangrast í samfélaginu og lendir oft í skilningsleysi og fordómum af einhverju tagi í þjóðfélaginu. Bæklingurinn ætti að leiða fólk í sannleikann um sjúkdóminn og vonumst við til að hann dragi úr þessum neikvæða fylgifiski málstols.Kortin sem við bjuggum til er fyrir þá sem hafa fengið málstol svo þeir eigi auðveldara með að fá skilning og þolinmæði frá samfélaginu þegar þess gerist þörf.“
