Góður laugardagsfundur var haldinn í húsakynnum félagsins að Síðumúla 6, Reykjavík í morgun [laugardaginn 02.02.2013] og var fullt hús. Arnar Jónsson, leikari, kom í heimsókn og gerði nýsjötugur sínu “kvæðalífi” góð skil. Eftir skýrslu formannsins, Þóris Steingrímssonar, spiluðu og sungu þau Edda Þórarinsdóttir leikkona og Kristján Hrannar hljómlistamaður, við undirleik þeirra Páls Einarssonar, bassi, og Magnúsar Pálssonar, klrinett. Þá kom Arnar Jónsson og flutti nokkur kvæði, þ.á.m. Gunnarshólma við mikla hrifningu. Greindi hann fundarmönnum frá kynnum sínum af Davíð Stefánssyni, skáldi, og uppsetningu Gullna hliðsins á Akureyri.
Gæddu fundarmenn sér síðan á góðu kaffi og miklu meðlæti og á kaffihópur félagsins miklar þakkir skilið. Er fundi lauk tóku þau Edda Þórarins og félagar nokkur lög úr “Saumastofunni” eftir Kjartan Ragnarsson og sýndar voru myndir um forvarnarþætti félagsins.
