Opinber þjónusta hefur færst í meira mæli yfir á netið sem veldur því að ýmsir í málstolshópum eiga erfitt með að sinna almennum daglegum störfum án aðstoðar, s.s. að sjá um fjármál, skila skattskýrslu, sækja um þjónustu og úrræði á vegum hins opinbera og fleira. Vandinn liggur í því að þessi rafrænu kerfi, vefsíður og gáttir eru ekki þróaðar með þarfir þessa hóps í huga. Þessi vandi snýr því að lýðræði, þátttöku og aðgengi. Fulltrúar HEILAHEILLA, Þórunn Halldórsdóttir og Axel Jespersen, fóru á stjórnarfund Nordisk Afasiråd í Stokkhólmi, dagana 12-13 september s.l. sem er samnorrænt samstarfsverkefni um málstol. Heilaheill hefur verið aðili að þessari stjórn frá 2013 og hefur einvörðungu verið fjallað um málstol. Þau önnur sem hafa sótt þessa stjórnarfundi á vegum félagsins eru þau Þórir Steingrímsson, form., Guðrún Torfhildur Gísladóttir, Bryndís Bragadóttir og Sigríður Sólveig Stefánsdóttir. Afar mikilvægt er fyrir félagið að taka þátt í umræðunni um málstol á Norðurlöndum.
Ekki er það neinum vafa undirorpið að þátttaka félagsins í þessari umræðu eykur þrýsting á íslensk heilbrigðisyfirvöld um að standa sig betur er varðar þennan málaflokk. Er hér um að ræða einföld mannréttindi!
