Heilabrot
Það hefur ekki farið framhjá neinum, að ný stjórn hefur tekið við landinu undir forystu Jóhönnu Sigurðardóttur fyrrum félagsmálaráðherra en Ásta Ragnheiður Jóhannesdóttir sem eitt sinn starfaði sem upplýsingafulltrúi Tryggingastofnunar hefur tekið við því ráðuneyti. Það er því ljóst, að þessir forystumenn í nýrri ríkisstjórn eru kunnir félags – og tryggingamálum. Báðir ráðherrar hafa tilkynnt mikla endurreisn ímálefnum þeirra sem minna mega sín.
Þessi ríkisstjórn hefur ekki langan tíma til stefnu, eða aðeins um 80 daga. Margir hópar munu sækjast eftir leiðréttingar sinna málefna. Einn hlýtur að vera Öryrkjabandalagið. Meðal okkar hlýtur að vakna sú spurning hvort Heilaheill eigi ekki að leita eftir skilningi og stuðningi nýrra stjórnvalda?
Á hvaða sviðum getur þessi aðstoð við okkur farið fram? Að mörgu er að taka. Fyrir utan hreinan fjárstuðning til Heilaheilla, má nefna skilning og aðstoð við uppbyggingu neytendastýrðrar þjónustu sem nærreyndar til fleiri hópa en Heilaheilla. Auk þess er mikilvæg,t að samtök okkar leiti eftir stuðningi við endurhæfingu skjólstæðinga og bótum á húsnæðismálum þeirra sem hlotið hafa heilaslag. Upplýsingar og fræðsla um heilaslag er afar mikilvægt svo almenningi sé ljóst hvað heilaslag er og hver hættan sé á að fá slíkt áfall.
Þetta eru aðeins nokkur atriði. Af nógu er að taka. Auðvitað eru málefni Heilaheilla tengd heilbrigðisráðuneytinu. Það er því nauðsynlegt að þessi tvö ráðuneyti myndi samstarf við samtök okkar og um málefnin. Síðast en ekki síst kemur fjármálaráðuneytið að þessu málefni eins og að starfi og útgjöldum allra ráðuneyta. Þótt núverandi ríkisstjórn vinnist ekki tími til að framkvæma allar óskir okkar í smáatriðum geta fyrrnefnd ráðuneyti lagt línur fyrir störf ráðuneyta á komandi tímum.
Heilaheill/Ingólfur Margeirsson
