Það vaknaði sú spurning hjá fundargestum HEILAHEILLA laugardaginn 5. maí s.l., er sendur var beint út á Facebókinni, hvort mögulegt væri að fækka heilaslögum (heilablóðföllum) hér á landi úr áætluðu meðaltali úr tveimur niður í einn á dag, eða jafnvel færri, eftir að hafa hlustað á Björn Loga Þórarinsson taugasérfræðing og lyflækni á Landspítalanum og Marianne Elisabeth Klinke hjúkrunarfræðing, forstöðumann fræðasviðs í hjúkrun tauga- og taugaendurhæfingasjúklinga á Landspítalanum.
Eftir stutta yfirferð Þóris Steingrímssonar, formanns, um áhættuþætti heilablóðfalls m.a. um gáttatiif og heila-appið, tóku þau við og blésu eldmóði í félagsmenn. Kölluðu þau eftir góðu samstarfi aðila um að koma á bættari verkferlum alls hjúkrunarliðs um land allt, svo að fólki sé ekki mismunað eftir búsetu! Heilaheill hefur verið með kynningarfundi um landsbyggðina um heilablóðfallið að undanförnu og orðið þess vart að mörgum hverjum finnst eins og þeir séu gleymdir vegna fjarlægðar frá Landspítalanum!!
Á fundinum komu fram hugmyndir um að Landspítalinn, sem aðalheilsugæslustofnun landsins, stæði fyrir stofnun sérstaks sjóðs, er stæði straum af kostnaði við að bæta verkferla heilsugæslunnar um land allt! Þannig að hver sá sem kennir sér slags, fái sömu meðhöndlun hvar sem hann eru staddur á landinu. Eftir eldheit erindi þeirra las Helga Jónsdóttir, leikkona, upp úr verkum þeirra Matthíasar Jóhannesen og Vilborgar Davíðsdóttur, gestum til mikillar ánægju.
Gæddu fundargestir sér á meðan á góðum veitingum og í lokin þakkaði formaðurinn þeim komuna á þessum síðasta fundi vetrarins, hlakkaði til að sjá þá í byrjun september og fóru þeir síðan ánægðir heim!
