Málstolshópur HEILAHEILLA “TÖKUM TIL MÁLS” kom sér saman, ásamt aðstandendum á ánægjulegri “lokaæfingu” að vori, á vænum veitingastað laugardaginn 17. maí s.l. og naut góðs hádegisverðar. Er þetta annað árið sem þetta átak hefur verið innan félagsins og hefur þjálfunin farið fram í aðstöðu þess í Mannréttindahúsi ÖBÍ, Sigtúni 42, Reykjavík. Hafa talmeina-fræðingarnir dr. Helga Thors og Þórunn Hanna Halldórsdóttir M.Sc., aðjúnkt í Háskóla Íslands, nú teymisstjóri hjá Kjarki, endurhæfingu, stýrt þessari þjálfun með vænlegum árangri. Þóri Steingrímssyni, formanni HEILAHEILLA, var boðið sérstaklega á þessa æfingu og í ráði er að halda þessari þjálfun áfram að hausti komanda og er opin öllum, – hvort sem málstolið er vegna slagsins eða utanaðkomandi áverka. Þeir sem telja sig geta notið góðs af þessari þjálfun geta haft samband í síma 860 5585 eða netfangið heilaheill@heill.is.
