Vetrarstarfið hafið um heilablóðfallið á fjölmennum fundi! Laugardaginn 7. september riðu, hjúkrunarfræðingarnir Marianne E. Klinke forstöðumaður fræðasviðs í hjúkrun tauga- og taugaendur-hæfingasjúklinga og Ingibjörg Bjartmarz starfandi á Grensásdeild, á vaðið og héldu markverð erindi um endurhæfingu eftir slag. Áður flutti Þórir Steingrímsson, formaður HEILAHEILLA erindi um félagið sjálft og sýndi nokkur myndbönd um starfsemi þess og erindi. Bar að sama brunni í málflutningi þeirra, – að áfall er ekki endirinn og miðast endurhæfing eftir slag við einstaklingsgetu hvers og eins. HEILAHEILL hefur verið með kynningu á fyrstu einkennum slags að undanförnu um landsbyggðina, undir slagorðunum “Látum slag standa” og hvatti til skjótrar meðferðar við áfallið og þær Marianne og Ingibjörg lýstu vel fyrir fundarmönnum endurhæfingagetu heilans. Eftir nokkrar fyrirspurnir drukku menn kaffi og ræddu saman. Næsti fundur er áætlaður laugardaginn 19. október og eru allir hvattir til að mæta og kynnast möguleikum um að koma í veg fyrir frekari skaða eftir áfall.
